تحديث Sony a7S III

ويش الجديد

• 5.01 (28 مايو 2026): إصلاح جزء من إطار التركيز الأخضر ما يطلع مع Expand Spot، وتحسين ثبات التشغيل.
• 5.00 (3 فبراير 2026): معلومات التصوير تنعرض للتصوير الأفقي والعمودي؛ ومناطق تركيز Spot XL وCustom 1-3 (ونسخ Tracking منها)؛ وتكبير شاشة القائمة؛ وعرض المساحة الباقية في الكرتين وقت التسجيل المتتابع أو المتزامن؛ وUSB streaming؛ وWrite Digital Signature للفيديو وأوامر Volume Photography License (الاثنين يحتاجون ترخيص مدفوع من Sony)؛ وإصلاح تسجيل الصوت لما Audio Recording مطفي.
• من 4.00 (22 أبريل 2025): الكاميرا ما عادت تدعم وظيفة IPsec ولا الواي فاي بنظام WPA/WEP (استخدم Access Authen. وWPA2 أو WPA3).

طريقة التحديث

1. نزّل ملف BODYDATA.DAT من صفحة Sony (الزر تحت). وتقدر بعد تنزّله من تطبيق Creators' App.
2. فرمت كرت الذاكرة من الكاميرا نفسها (الفرمتة تمسح كل اللي في الكرت)، بعدين احفظ BODYDATA.DAT في أول الكرت. لا تغيّر اسمه، وخلّ ملف BODYDATA.DAT واحد بس في الكرت.
3. استخدم بطارية NP-FZ100 مشحونة كامل (التحديث ما يشتغل إلا من 51% وفوق)، وشيل القبضة العمودية.
4. ركّب الكرت في الكاميرا، وروح MENU › Setup › Setup Option › Version › Body، واختار Software Update وبعدين Execute.
5. التحديث ياخذ حوالي 6 دقايق. لا تشيل البطارية ولا الكرت. الكاميرا تعيد التشغيل بروحها لما يخلص.

إذا الكاميرا حارة ممكن التحديث ما يبدأ، فانتظرها لين تبرد.

حط الكرت في المنفذ 1، لأن المنفذ 1 بس يقرأ التحديث. وإذا كاميرتك على 2.15 أو أقدم، حدّث لـ 3.01 أول وبعدين 5.01: Sony تقول إذا رحت على طول لـ 5.01 يطلع خطأ.

نحدّثه لك في المعرض

احجز موعد وموظف المبيعات عندنا يحدّث جهازك في المعرض: 2.000 ر.ع. إذا اشتريته من أفلاك السماء، و5.000 ر.ع. إذا اشتريته من مكان ثاني (شامل الضريبة، والدفع في المعرض).

لما تحجز، اكتب الإصدار اللي يطلع في جهازك الحين (شوف طريقة التحديث فوق). يتأكد منه أول: إذا جهازك محدّث، يخبرك وما تحتاج تجي.